Guddoomiyaha Aqalka Sare ee Baarlamaanka Jamhuuriyadda Federaalka Soomaaliya Mudane Cabdi Xaashi Cabdullaahi iyo wafdi heer sare ah ee uu hoggaaminayo oo booqasho rasmi ah ku jooga Magaalada Moscow ee dalka Ruushka, ayaa kulan gaar ah la qaatay Guddoomiyaha golaha Federaalka Baarlamaanka Dowladda Ruushka Marwo Valentino Matvienko waxayna ka wada hadleen adkaynta xidhiidhka soo jireenka ee labada dal, iskaashiga iyo qibrad wadaag dhax mara Aqalka Sare iyo Golaha Federaalka ee Baarlamaanka Ruushka.
Guddoomiye Valentino Metvienko ayaa adkaysay in dowlada Ruushka ay garab taagantahay dowladda Soomaaliya isla markaana diyaar u yihiin in ay ka caawiyaan dhinacyada militariga, waxbarashada, tababarka ciidamada iyo kaalmada bini’aadanimo.
Guddoomiye Cabdi Xaashi ayaa dhankiisa sheegay in xidhiidhka Soomaaliya iyo dowlada Ruushka uu yahay mid soo jireen ah soona bilawday 1964-tii kadib afar sanno xornimadii Soomaaliya, sidoo kale Guddoomiyuhu wuxuu xusay kaalintii lama ilaawaanka ahayd ee dowladdii Midowga Sofiyeet ay ka qaadatay samata-bixinta bulshadii Soomaaliyeed ee ay saameysay abaartii dhacday 1974-tii ilaa 1975-tii.
Uga dambeyn Guddoomiyaha ayaa uga mahadceliyey Marwo Valentino Metvienko soo dhawaynta diiran isagoo oo xusay in dowladda Soomaaliya ay diyaar u tahay in ay xidhiidh wanaagsan la yeelato dowladda Ruuska.
